من هم عباد الرحمن؟ و ماهى صفاتهم؟ شرح " إلا من تاب "


" إلا من تاب "

بسم الله والصلاة والسلام على رسول الله ..  وبعد …

معادنا النهاردة مع صفة من صفات أفضل خلق الله .. واللى ربنا نسبهم ليه ولإسمه العظيم .. وسماهم " عباد الرحمن " .. وهى " إلا من تاب وعمل عملا صالحا .. فأولئك يبدل الله سيئاتهم حسنات .. وكان الله غفورا رحيما ِِِ ومن تاب وعمل صالحا فإنه يتوب إلى الله متابا "  ...

صفة التوبة .. صفة الرجوع .. صفة الندم .. صفة الانكسار .. صفة الحسرة على ما ارتكبو من ذنوب ...

كلنا سمعنا كتير عن التوبة واهميتها .. وسمعنا كمان عن شروطها .. والراحة النفسية بعدها .. لكن روعة الآيات النهاردة .. صعب تتوصف  بكلمات .. لان الاحساس بمعنى الايات دى احساس عالى جدا وراقى .. وميوصلش غير بتجربته .. 

آيات النهاردة رسالة لكل مذنب .. ولكل عاصى .. ولكل فاقد للأمل من رحمة ربنا .. للى نسى قول الله " ولا تيأسوا من روح الله " .. ونسى قوله تعالى " قل ياعبادى الذين أسرفوا على أنفسهم .. لا تقنطوا من رحمة الله .. إن الله يغفر الذنوب جميعا .. إنه هو الغفور الرحيم " .. تعالو مع بعض نشوف الآيات الجليلات دول بتقول ايه ...

لما تكون مذنب .. وحاسس انك مخنوق من نفسك جدا .. والخنقة والضيق مالين عليك حياتك من الذنوب .. وحبيت ترتاح بإنك ترجع للى خلقك .. وتتوب اليه وتستغفره .. وكلك أمل انه يقبلك .. واكيد هيقبلك .. عارف ليه .. لان الرسول قالنا ان ربنا هيكون فرحان برجوعنا ليه .. تائبين نادمين .. اكتر من فرحة والدتك برجوعك لحضنها بعد ماكنت بعيد عنها .. وحاسة انك فى خطر من غيرها .. ومكنتش تعرف ان فى احساس احلى من كدا .. ان وأمك تلاقيك معاها تانى .. ودموع الفرحة فى عينيها .. لان قرة عينيها وفلذة كبدها .. رجعلها تانى .. لكن لأنك عبد لإله اسمه " الرحمــــــــن " .. بيفرح هو بيك  اكتر من فرحة امك دى .. ومش بس كدا .. 

دا كمان بيريحك من ذنوب الماضى اللى خنقاك وتعباك .. ويبدلهالك كلها حسنات تتنعم بيها يوم القيامة .. عارف ليه ؟!! .. لانك فى يوم آمنت من قرارة نفسك بحاجة واحدة هى .. لا اله إلا الله .. محمداً رسول الله .. ولأنك فى يوم .. رضيت بالله ربنا .. وبالإسلام دينا .. وبمحمد صلى الله عليه وسلم نبيا ورسولا ...

ياللى مخنوق ومش عارف السبب .. ياللى مهموم والدنيا مقفلة معاك .. ياللى مش حاسس انك زى زمان .. متبصش هو انت لسة ايه معملتوش عشان ترتاح .. لكن بص للى عملته فعلا وخلاك تندم كدا .. وابعد عنه .. واتخلص منه .. وبدله بطاعة .. ورضا الرحمن الرحيم عليك .. لأن " من اعرض عن ذكرى .. فإن له معيشة ضنكا " .. 

يلا كلنا نرجع لربنا .. ومنبعدش عنه أبدا .. يلا نتوب ونعزم على رضا الله ومفيش عنه بديل .. وتعالو نعرف هنتوب ازاى :

1- الندم على اللى انت عملته من ذنوب .
2- العزم على انك مش هترجعله تانى .
3- تتوضى وتصلى لله ركعتين بنية التوبة النصوح ليه سبحانه وتعالى .
4- وتدعى ربنا دايما انه يعصمك ويحفظك .

وهى دى التوبة النصوح .. قال ربى " يا أيها الذين ءامنوا توبوا إلى الله توبة نصوحاً " .. " و إني لغفار لمن تاب وءامن وعمل صالحًا ثم اهتدى " ..

يارب تكون حلقة النهاردة عجبتكو .. والفكرة وصلت .. وطبعا زى مانتو عارفين الموضوع كدا قصير اوى .. بس كان لمجرد التذكرة مش أكتر ...

اللهم اجعلنا ممن يتوب اليك متابا ..
اللهم تب علينا لنتوب .. وتقبلنا وتقبل توبتنا يارب العالمين ..

سبحانك اللهم ربنا وبحمدك .. أشهد أن لا اله الا أنت .. أستغفرك أتوب إليك …
وصلى الله وسلم على نبينا وحبيبنا  " محمد "
والسلام عليكم ورحمة الله وبركاته

شارك الموضوع

مواضيع ذات صلة