‏إظهار الرسائل ذات التسميات همسات. إظهار كافة الرسائل
‏إظهار الرسائل ذات التسميات همسات. إظهار كافة الرسائل

المدينه الفاضله بين الواقع والخيال

 حلمنا كثيرا بالمدينة الفاضلة .. تلك المدينة الافلاطونية التى اعتقد الفلاسفة انهم يستطيعون بنائها بحكمتهم وفلسفتهم .. ولم تخرج هذة الفكرة للنور لانة وببساطة لايوجد شىء كامل .. ولكن مازلت اؤمن اننا نستطيع بناء هذة المدينة حتى وان لم تكن كاملة فلتكن اقرب للكمال .. فهيا بنا  نتخيل معا تلك المدينة التى نتمناها ..

 المدينة التى تقيّد شهوات النفس الانسانية وتسمو بالروح الى اعلى درجات الكمال .. مدينة يعيش فيها كل من الخير والصدق والجمال فى سلام تحت راية العدل .. يحيط بهم الامل .. يدافع عنهم الحق  .. نعيش فيها على انغام الرومانسية الراقية وألحان الموسيقى الهادئه.. فقط مع من نحب ومن اجل من نحب  .. نرى بنور الامل .. نحلم بغد مشرق .. ننام على ضوء القمر .. نتنفس نسمات الحياه على امواج البحر الهادئة .. فنأخذ نفسا عميقا ونبتسم لنستيقظ من نومنا على واقع مغاير تماما لما نراة فى خيالنا .. فنحزن قليلا  ونبكى كثيرا .. 

ولكن سرعان ماندرك بانه الواقع الذى لانستطيع الهرب منه .. هذة المدينة التى لطالما تخيلتها ولا استطيع العيش فيها سوى فى خيالى الى الدرجة التى جعلتنى اتمنى لو كانت حياتى كلها خيال .. ولكننى ابتسم عندما أدرك ان حياتنا هى بداية النهاية لحياة ابدية أخرى بعد الموت قد نصل فيها الى " المدينه الفاضلة " تحت راية العدل الالهى وهى  "جنه الله عز وجل" .. وهنا أدركت ان حياتنا ابسط بكثير مما يعتقد البعض واننا قادرين على بناء هذة المدينة داخل انفسنا حينما نرتقى بأخلاقنا ونسمو بديننا ونتمسك بقيّمنا ونتسامح مع أنفسنا.. 

ولا ننسى ان ديننا الاسلامى بكل مافية من اومر ونواهى يدعونا للكمال .. قد يتهمنى البعض بالمثالية وقد يتهمنى البعض الاخر بالجنون ولكن المدينة التى اراها فى خيالى اكبر بكثير من كل هذة الاتهامات وسأظل احلم بها حتى وان لم تتعدى حدود خيالى او اسوار نفسى .. فهيا بنا نبنى داخل انفسنا المدينة التى نحلم بها بكل مافيها من سمو للاخلاق واعلاء للمشاعر .. على امل ان نلتقى معا فى اكبر مدن العالم كمالا وهى جنات رب العالمين .. حياتك بتبدأ بفكرة .. فكرتك ملكك .. وخيالك مدينتك .. ونفسك حياتك .. واكيد بكرا احلى

بكره احلى الحلقه التاسعه بعنوان "علمتنى الحياه"



كان يامكان ياسعد يااكرام فى سالف العصر والاوان ولد صغير عنده 12سنه وكان عنده حلم نفسه يحققه .. حلمه يطير طياره ورق !! ايووه طياره ورق .. اول ماخلص امتحاناته بدأ بسرعه يعمل الطياره و طلع فوق سطح البيت وبدأ يطيرها .. الطياره تروح يمين وتروح شمال ومش عارف يطيرها فوووووق فى السما زى ماهو عايز .. ماهو ده كان حلمه بس مش قاادر .. و نام زعلان فى اليوم ده لانه ماقدرش يحقق حلمه. و كان الولد ده هو أنا !!


بس كان عنده اصرار انه يطيرها وقام بسرعه الصبح بدرى ومن غير مايفطر وكان كل تفكيره يحقق حلمه .. بدأ يطير الطياره الورق .. طارت يمين وطارت شمال ووقعت على شجره قدام البيت والخيط اتقطع !! نزل بسرعه من البيت وطلع على الشجره جاب الطياره الورق وهو نازل من ع الشجره وقع وكان بيتألم .. بس رجع بسرعه وطلع فوق السطح تانى يطير الطياره ! طارت يمين وطارت شمال وبدأ الهوا يزيد وبدأت تطير لفوق .. لحد ماطاارت فوووووق فى السماااا .. الولد هايطير من الفرحه .. طيارتى الورق بتطير فى السما.


ومن يومها وعرفت ان الحلم مش صغير وكبير .. الحلم حققته ولا محققتوش ! يااه احنا لسه بنتكلم عن تحقيق احلامنا !! فى الوقت اللى انا عماال اكلمكوا فيه عن حلمك وانك لازم تحققه .. دلوقتى الغرب عندهم فكره جديده وهم انهم يتحكموا فى احلام الناس عن طريق انهم يزرعوا افكار جواها وهم نايمين !

 وفكرتهم انهم يزرعوا افكار جوه عقول الناس المشهوره اللى بتأثر فى ناس كتيره بهدف تحقيق اى حاجه هم عايزينها .. يزرعوا فكره جوه عقلى وانا نايم !! ايووووه .. لا وكمان لو الفكره انت مقتنع بيها اوى وصعب  يغيروها فى حلمك بيدخلوا جوه حلمك ومن حلمك الاول بيدخلوا لحلم تانى وهكذا .. يعنى "حلم جوة حلم جوه حلم جوه حلم " لحد مايوصلوا للفكره ويغيروها !!

 اية ياعم الافكار الغريبه دى ! انت هاتشتغلنا ! حلم اية اللى جوه حلم ويغيروا فكره اية وانا نايم هو انا بطيخه نايمه ؟! بالظبــــط انا عايز اوصل للفكره دى .. ان احنا مش متقبلين ثقافه الافكار الجديده ولسه مش مصدقين انها ممكن تتحقق وده بالظبط اساس تأخرنا .

وهنا عايز اسالك سؤال .. تفتكر هدفى من كتابه الموضوع ده ايه ؟؟ انى أقنعك بأنك لازم تحقق حلمك الواقعى ؟؟ لا طبعا لان دى بقت حاجه قديمه عيب اوى نتكلم فيها .. طيب أقنعك بانك لازم تطير طياره ورق ؟؟ ههههه لا طبعا برضو .. امال اية ؟؟ كل اللى فوق ده تمهيد للحاجه اللى عايز اتكلم عنها وهو اننا لازم  نقتنع بالافكار الغريبه والجديده زيها زى الافكار العاديه اللى ممكن نحققها لان ايمانا بالفكره دى هى اول خطوه لتحقيقها .. ومن هنا كانت عنوان حلقه انهارده " علمتنى الحياه "  وبدأت فيها بفكره صغيره كان نفسى احققها وهى انى اطير طياره ورق لحد ماوصلت لفكره اكبر بكتير ومعقده جدا وهى " زرع الافكار" .. وزى ما علمتنى الحياه انى  قادر احقق حلمى الصغير 

علمتنى برضو انى اقتنع باى فكره جديده مهما كانت درجه تعقيدها ومش شرط الفكره دى تكون " زرع الافكار " فى حد ذاتها .. لا ده مثال على اى فكره غريبة ممكن تقابلك فى حياتك .. فيه ناس بتحلم  .. وناس بتحلم وتحقق .. وناس بتندهش باللى وصله ناس تانيه .. وفوق ده كله فيه ناس شايفه ان اكيد " بكـــــــرا احلــــى "

بكـــره أحلى الحلقه الثامنه بعنوان " قصص وحكايات "




انهارده هاحكيلكوا قصص وحكايات بقى عشان الناس تفرفش كده  !!


احم احم ..  بيقولك بقى وبعد ماصحى من النوم راح وقالها كل حاجه .. لا بس هى اللى غلطانه  حد قالها تعمل كده .. هو اللى يستاهل ماهو برضو لما جه من السفر مراحش يسلم عليها .. بيقولك اصلا ان هو اللى عايز كده !! انت تعرف اصلا ده بيقولوا انه كان معاه فلوس أد كده بس هو اللى غبى ضيعها ! أصل بص بقى مراته الاولانيه سابته اااه زمبؤلك كده !!

الجمل اللى فاتت دى مش من مسلسل تركى  ولا حتى قصه وهانرتبها .. دى للاسف حقيقه .. كتير مننا بيبقى قاعد وسامع ناس كتير بتتكلم على ناس بدون اى وجه حق !! وساعات كتير انت نفسك بتعمل كده وانت مش واخد بالك !!

لو افترضنا ان كل جمله من اللى بتتقال دى بتتقال فى حق واحد او واحده مش موجوده .. واتنين جايبين فى سيرته .. تعرف ربنا شبهها بايه ؟؟ أكيد سمعت الآيه دى قبل كده يقول الله عز وجل:
.
 " أيحب احدكم ان يأكل لحم أخيه ميتا فكرهمتوه "
.
  ايووه عايزك  تقف هنا شويه وارجع اقرأها تانى بس المرادى اتخيل تشبيه  ربنا فى الآيه دى .. ربنا بيشبه الكلام فى حق الناس والغيبه والنميمه كأنك بالظبط بتاكل فى لحم أخيك ميتا !! التشبيه فعلا فظييييع .. اه بس انت عارف ايه الاصعب من التشبيه ؟؟  انك تكون واحد من الناس دى اللى دايما بتجيب فى سيره اللى حواليها !

الموضوع ده فعلا منتشر جداا بين الناس .. ودورك مش انك بس متتكلمش فى حق حد  .. لا كمان انصح اللى حواليك وحاول مره واتنين وتلاته لحد ماتعودهم يبعدوا عن العاده دى وتبقى سبب فى دخولهم الجنه لا وكمان لما تعلم حد يبعد عن العاده دى هاتبقى صدقه جاريه ليك حتى بعد الموت لان كل مره هو هايبعد عن المووضع ده أكيد انت ربنا هيجازيك خير زيه بالظبط  !!

خلى دايما ليك دور ايجابى فى الحياه .. وابدأ بنفسك وباللى حواليك

بكره احلى الحلقه الثامنه بعنوان ( قصص وحكايات )



انهارده هاحكيلكوا قصص وحكايات بقى عشان الناس تفرفش كده خصوصا بقى العيد داخل ورمضان هايمشى فنقول قصص براحتنا !!

احم احم ..  بيقولك بقى وبعد ماصحى من النوم راح وقالها كل حاجه .. لا بس هى اللى غلطانه  حد قالها تعمل كده .. هو اللى يستاهل ماهو برضو لما جه من السفر مراحش يسلم عليها .. بيقولك اصلا ان هو اللى عايز كده !! انت تعرف اصلا ده بيقولوا انه كان معاه فلوس أد كده بس هو اللى غبى ضيعها ! أصل بص بقى مراته الاولانيه سابته اااه زمبؤلك كده !!

الجمل اللى فاتت دى مش من مسلسل تركى  ولا حتى قصه وهانرتبها .. دى للاسف حقيقه .. كتير مننا بيبقى قاعد وسامع ناس كتير بتتكلم على ناس بدون اى وجه حق !! وساعات كتير انت نفسك بتعمل كده وانت مش واخد بالك !!

لو افترضنا ان كل جمله من اللى بتتقال دى بتتقال فى حق واحد او واحده مش موجوده .. واتنين جايبين فى سيرته .. تعرف ربنا شبهها بايه ؟؟ أكيد سمعت الآيه دى قبل كده يقول الله عز وجل:
.
 " أيحب احدكم ان يأكل لحم أخيه ميتا فكرهتموه "
.
  ايووه عايزك  تقف هنا شويه وارجع اقرأها تانى بس المرادى اتخيل تشبيه  ربنا فى الآيه دى .. ربنا بيشبه الكلام فى حق الناس والغيبه والنميمه كأنك بالظبط بتاكل فى لحم أخيك ميتا !! التشبيه فعلا فظييييع .. اه بس انت عارف ايه الاصعب من التشبيه ؟؟  انك تكون واحد من الناس دى اللى دايما بتجيب فى سيره اللى حواليها !

الموضوع ده فعلا منتشر جداا بين الناس .. ودورك مش انك بس متتكلمش فى حق حد  .. لا كمان انصح اللى حواليك وحاول مره واتنين وتلاته لحد ماتعودهم يبعدوا عن العاده دى وتبقى سبب فى دخولهم الجنه لا وكمان لما تعلم حد يبعد عن العاده دى هاتبقى صدقه جاريه ليك حتى بعد الموت لان كل مره هو هايبعد عن المووضع ده أكيد انت ربنا هيجازيك خير زيه بالظبط  !!

خلى دايما ليك دور ايجابى فى الحياه .. وابدأ بنفسك وباللى حواليك



بكره احلى الحلقه السابعه (القدره على التغيير)



 " خد صاحبك على عيبه " " اقبل مراتك  على عيبها " " ماتشتغلش نفسك ياعم انت هاتغير الناس !! "  هو انت فاهم انك هاتغير الكون ؟؟ كان غيرك اشطر .. روتين .. ملل .. بيت وولاد وشغل وفلوس .. اللى نعرفه احسن من اللى منعرفوش !!
مش هاقولكوا دى اقوال مأثوره بس دى أقوال " مشلوله " بنسمعها كل يوم و بجد فعلا يعنى من اكتر الحاجات اللى بتضايقنى جدا هى الجمل دى !!


يعنى  ايه مثلا خد صاحبك على عيبه  ولا مراتك على عيبها؟؟ يعنى انا المفروض افضل اتحمل عيبهم ده طول عمرى ؟؟ وليه يعنى  ؟؟ وذنبى انا ايه ؟؟  وليه ماتقولش غيّر عيب صاحبك وخليه للاحسن وهو كمان يغير عيبك ويخليك أحسن ؟؟ غيّر عيب مراتك وخليها أحسن وهى كمان تغير عيوبك وتخليك أحسن ؟؟ ليه دايما عندنا فكره اننا نتقبل الامر الواقع وخلاص ؟؟ اه معاك ان ساعات فيه ناس مبتعرفش تتغير بس تحاول ولو معرفتش تحاول تانى وتالت ورابع لحد مايبقى قدرتك على التغيير اكبر من عيبك نفسه !!

تعالوا بقى نغير الاقوال اللى فوق دى بأقوال تانيه وشوف الفرق عشان تعرف ان فعلا لو قدرت تقتنع بكده بكره بتاعك هايبقى  أحلى بكتير

غير عيب صاحبك  .. طلق مراتك لو فضلت على عيبها :D  .. أنا هاغير اللى حوليا .. اه انا هاغير الكون .. اه انا اشطر من غيرى .. تجديد .. مفيش روتين .. اللى منعرفوش بيبقى ساعات أحسن بكتير من اللى نعرفه .. جرب .. اتغير .. اقبل الافكار الغريبه .. فكر بطريقه مختلفه

وهاختم بقى بمثل انجليزى بيقول " لوفضلت تعمل كل يوم نفس اللى انت متعود تعمله .. هتاخد بس طول عمرك اللى انت متعود تاخده وبس "

 وساعتها بقى متلومش ظروف ولا تلوم اللى حواليك .. لوم نفسك لانك بتحاول تبقى ثابت فى كون بيتغير !!









بكره احلى الحلقة السادسه بعنوان " الطريق للنجاح"


 تفتكر لو غمضت عنيك لمدة دقيقتين وبدأت تفكر فى طريق النجاح .. تفتكر هايبقى شكلة عامل ازاى ؟؟ ضلمة ؟؟ فية حجارة كتير ؟؟ صعب ؟؟ كل دى افكار ممكن تيجى فى دماغنا .. طيب تعالى نشوف اية هى اول خطوة فى الطريق دة .

الخطوة الاولى هى " الثقة بالنفس " وهى انك تبدأ تثق فى قدراتك وانك قادر تحقق هدفك .. انت تعرف ان الانساان من اول يوم فى حياتة لاخر يوم  بيستخدم 10% بس من اجمالى قدراتة الحقيقية !! ياااااة اانا بستخدم 10% بس ؟؟  ايوة طيب تخيل كدة لو بقى عندك ثقة فى نفسك انك تقدر تستخدم كل قدارااتك ؟؟

 الافكار السلبية اللى ممكن تاخدها عن نفسك زى  " لا مش هاقدر " او " كان غيرى اشطر " اخطر بكتير واصعب من طريق النجاح نفسة " .. الافكار السلبية دى كلها ترجعك الف خطوه ورا ولا عمرك هاتحقق حاجة فى حياتك وزى ماتولدت هاتموت ولا هيكون ليك لزمة فى الحياة 

طيب تيجى نبدأ نغير الافكار السلبية دى وتبدأ تقول " ايوة انا اقدر "  " مفيش حد احسن منى " " ربنا ادانى قدرات كتير ولازم ابدأ استخدمها " وهاقدر استخدمها " وهانجح " وابقى مبسوط من نفسى " وهاسعد اللى حوليا بنجاحى " الافكار دى بس فى حد ذاتها تخليك تاخد الف خطوة لقدام 

عشان كدة انا بشبة الافكار اللى فى عقل الانسان بالبحور اللى بتتلاقى امواجها كل بحر بفكرة معينة وعشان تقدر تحققها لازم تعلّم  " نفسك " السباحة ولو لسة شايف انك مش هاتقدر تعوم هاتفضل طول عمرك واقف ع الشط  فى الوقت اللى فيه ناس غيرك بتلف العالم بايمانها بقدراتها وثقتها بنفسها ..

 حياتك اختياراتك بايديك تخليها جنة وبايديك تخليها ناار .. ثقتك بنفسك اول خطوة على طريق النجاح.


بكره احلى الحلقه الخامسه بعنوان (.........)


الحلقه دى بعنوان " ………. "

 هاخليك انت تحط عنوان للحلقه دى بعد ماتجاوب ع السؤال ده .. تعالى فكره معايا كده شويه !! ياترى ايه هى الصفه اللى لو ملكتها يبقى ملكت كل الصفات التانيه ؟؟!!  ياترى الصفه دى هى التدين ؟؟ الأخلاق ؟؟ الذكاء ؟؟ الطيبه ؟؟ لا طبعا كل واحده من الصفات دى لو ملكتها مش شرط يبقى عندك كــــــل الصفات الباقيه !! يعنى ممكن ابقى ذكى ومتدين وعندى اخلاق بس معنديش صفه الكرم مثلا او كسووول او مش عارف احقق اهدافى !! 

وهنا بقى هانيجى للاجابه على السؤال بتاعنا وهى نفسها عنوان لحلقتنا .. تخيل لو عندك طالب فاشل فى الدراسه  مع انه ذكى جداا ايه اللى هو محتاجه عشان يتحول من شخص فاشل لشخص ناجح ؟؟   طيب لو شخص سلبى ومبيشاركش فى أى حاجه فى حياته ، ايه اللى هو محتاجه عشان يتحول من شخص سلبى لشخص ايجابى ؟ الاجابه هى  " القـــدره على التغـيـير " 

ايووووووه .. يعنى انت لو عندك القدره على التغيير هاتقدر دايما على مر السنين تتحول من شخص فاشل لشخص ناجح . من شخص كسول لشخص نشيط من شخص عصبى لشخص هادى .. من شخص مش متدين لشخص متدين  .. وبكده يبقى لو ملكت الصفه دى يبقى انت ملكت كل شىء ف حياتك .. وهنا هاقولكوا مقوله عجبتنى جدا بتقول " الشىء الوحيد الثابت فى الحياه هو التغيير "

وعشان كده من وجهه نظرى كل ما كان قدرتك على التغيير أكبر كل ما كانت فرصتك فى النجاح أكبر ..  حاول دايما تغير نظرتك للحياه .. طريقتك فى التعامل .. طريقه عمل شغلك .. طريقه تفكيرك .. اقبل الافكار الغريبه فى حياتك حاول تعيش بطريقه مختلفه .. متبقاش شخص ثابت بيقوم كل يوم عشان يعمل نفس الشىء بنفس الطريقه ونفس الاسلوب !!

اللهم امنحنا السكينة لنتقبل الأشياء التي لا نستطيع تغييرها ... والشجاعة لتغيير الأشياء التي نستطيع تغييرها ... والحكمة لمعرفة الفرق بينهما .



بكره احلى الحلقه الرابعه ( حب الانجاز )



من أكبر الصفات الشخصيه المهمه جدا فى الانسان بعد ما اتكلمنا عن القدره على التغيير هى حب الانجاز .. يعنى ايه حب انجاز وليه مهم ؟؟ حب الانجاز معناه انك تقدر تحقق حاجه فى فتره قصيره جداا او حاجتين فى وقت واحد .. و من فوائد حب الانجاز مش بس انك بتحس انك انسان ناجح بس كمان بتحس انك عملت حاجات كتير فى وقت قليل جدا وده فى حد ذاته دافع تانى لانك تنجز أكتر وأكتر.



لو قسمت حياتك هتلاقى فيها أكتر من حياه يعنى حياتك الشخصيه والاجتماعيه والتعليميه والعمليه والدينيه وكل حياه فيهم بتعيشها لازم يكون بتنجز فيها عشان توصل لمرحله أعلى طول مانت عايش. بدل ماتحط هدف خلى عندك هدفين وبدل ماتحققهم فى سنتين حققهم فى سنه.



وعشان تبقى حياتك كلها لله وتبقى بتعمل للدنيا والاخره كمان حاول تخلى فوق كل هدف دنيوى هدف دينى يعنى ايه ؟؟ يعنى انت لو حطيت هدف مثلا تحققه فى الدنيا زى انك توصل لدرجه أعلى فى العلم .. ده هدف دنيوى .. أما بقى الهدف الدينى هو انك تفيد غيرك بالعلم اللى انت اتعلمته وده برضو اسمه انجاز عارف ليه ؟؟ لانك بتحقق هدفين فى هدف واحد. ومش بس كده برضو فى حياتك الشخصيه ممكن يبقى عندك هدفين هدف دينى وهدف دنيوى .. الهدف الدنيوى هو انك تكون أسره ناجحه وترتقى دايما فى المكانه الاجتماعيه .. والهدف الدينى من كده انك تحقق مراد ربنا فى اعمار الاراض وتعلم كل واحد فى الاسره دى انه يبقى فرد صالح فى المجتمع .. ده برضو اسمه انجاز.


تخيل بقى لو كل حياه بتعيشها سواءكانت عمليه او اجتماعيه او شخصيه او دينيه او حتى علميه حطيت ليها على الاقل هدفين واحد دينى وواحد دنيوى و تحققهم وتنجزهم فى نفس الوقت مع بعض زى ماقولنا كده .. هايبقى عندك على الاقل 10 أهداف ثابتبن تحققهم مع بعض وهو ده حـــب الانجاز .



جرب دلوقت كده وابدأ بتغيير الصفات السلبيه اللى عندك بقدرتك و اصراراك على التغيير للاحسن زى ماتكلمنا فى اول حلقه وبعدين الصفه التانيه المهمه جدا بعدها هى انك تنمى جوه نفسك حب الانجاز .. وشوف الفرق فى حياتك !!

بكره أحلى الحلقه الثالثه (المقارنه)


فيه ناس عقلها صغير جدا .. بتشغل نفسها بكل التفاصيل اللى حواليها .. الالوان والاشخاص والاحداث والكلام اللى بيتقال .. وده راح فين وده جه منين !! حاجه غريبه جدا .. ويمكن هم بيعملوا دايما كده عشان يقارنوا بين حياتهم و بين حياه باقى الناس .. ويبدأ يشوف بقى هو حياته كده احسن من اللى حواليه ولا اللى حواليه حياتهم أحسن !!


ميعرفش ان ربنا لما خلق كل واحد فينا خلقه مميز عن التانى .. يعنى احنا كلنا مختلفين عن بعض فى الاسلوب والشكل والطريقه والنوع والدين والعقل والشخصيه .. مختلفين تماامااا .. وبكده يبقى لما تقارن نفسك بغيرك انت ساعتها بتظلم نفسك لان انت ببساطه مش زى غيرك !! يعنى مثلا لو جينا نقارن بين البطيخ والاناناس مش هاتعرف تقارن بينهم لانهم مختلفين .. انما ينفع تقارن بين حاجتين من نفس النوع !!

و ده ميمنعش برضو انى أقارن .. بس المقارنه اللى انت لازم تعملها فعلا و هى المقارنه الصح .. انك تقارن بينك وبين نفسك يعنى ايه ؟؟ يعنى تشوف هل انت انهارده بقيت احسن من امبارح ولا مفيش حاجه اتغيرت ؟؟ انت السنادى بقيت احسن من السنه اللى فاتت ولا لسه زى مانت ! هو ده فعلا اللى المفروض تعمله وتشوف انت دايما وصلت لفين !! ولما تقارن و تلاقى نفسك اتغيرت فى حاجات كتير من سنه للسنه التانيه .. اسأل نفسك هى الحاجات اللى اتغيرت دى كانت تستاهل اعيش سنه كامله عشان أغيرها ولا السنه دى راحت كده ملهاش اى تمن !!

متقارنش بينك وبين الناس .. متركزش فى التفاصيل الصغيره اللى ملهاش لزمه .. ملكش دعوه بحد .. اعمل اللى انت مقتنع بيه وبس !!

أتغير للاحسن .. نمى عندك حب التغيير .. نمى عندك حب الانجاز .. استمتع بحياتك .. وفى الاخر متقارنش .. واكيد ان شاء الله بكره أحلى :)

بكره احلى الحلقه التانيه (استمتع)


بتيجى عليك لحظات فى حياتك تحس انك زهقت من نفسك !! زهقت من العيشه !! وتقعد تسأل نفسك انت عايش ليه ؟؟ بتحس بالملل اوقات واوقات تانيه تبقى طاير من الفرحه .. طب ساعات بتبقى فرحان جدا ومن غير سبب صح ؟؟ وساعات تبقى زعلان برضو من غير سبب !!

على فكره بيبقى فيه اسباب انت مش واخد بالك منها .. فيه حاجات بسيطه جدا ممكن تعملها فى يومك تخليك مبسوط جدا بس عشان انت شايفها بسيطه فمبتعرفش انها هى سبب فرحتك !! طيب زى ايه الحاجات دى ؟


زى مثلا انك تساعد حد فى حاجه هو عايزها وتشوفه مبسوط .. زى انك تدى ومتستناش مقابل .. زى انك تصلى وتدعى باللى نفسك فيه .. زى انك تقعد تتكلم مع نفسك شويه .. لان الكلام مع النفس من اهم اسباب راحه الانسان .. زى انك تفتكر ذكريات وقت جميل قضيته وتضحك مع نفسك.. زى انك تتصل بواحد  صاحبك من زمااان مكلمتوش وتشوف فرحته لما يسمع صوتك وهو مش مصدق .. زى ان والدك ووالدتك يبقوا راضيين عليك ويدعولك دعوه حلوه .. ممكن الدعوه دى تكون سبب فى فرحتك سنين قدام !! زى انك تتصدق على حد فقير كان مستنى اوى صدقتك دى ! زى التأمل فى الكون وتشوف عظمه ربنا فى خلق الكون !! أكيد مش دى كل حاجه ممكن تخليك مبسووط .. فيه حاجات تانيه كتييير زيها بس دى مجرد أمثله تاخد بالك منها 


حاجات بسيطه جدا مبنحسش بيها بس مهمه جدا فى حياتنا .. وعلى فكره لو ركزت فى كل الحاجات اللى بتخليك مبسوط دى هتلاقيها حاجات كلها انت اللى بتديها ؟؟ مش حد بيديهالك !! وده معناه انك انت الوحيد اللى ممكن تتحكم فى كونك مبسوط او زعلان .. السعاده والفرح مش حاجه انت بتاخدها دى حاجه انت بتعملها بنفسك وأثرها مش بيبقى عليك لواحدك لا بيبقى على اللى حواليك كمان .. حاول تعيش كل لحظه وكانها أخر لحظه .. وحاول تدى وكأن دى أخر مره هاتدى فيها .. وحاول تضحك من قلبك وكأن دى أخر مره هاتضحك فيها  .. حاول تعيش بجد ومش هاقولك وكانها آخر مره هاتعيش فيها لان انت بتعيش مره واحده وبس ! 

استمتـــــــــــتع .. عيشها ببساطه .. شوف الفرق  .. وأكيد بكره أحلى

بكره أحلى الحلقه الاولى (وجهه نظر)



(جدا بيها ومتمسك بيها مقتنع نظر وجهه عنده فينا انسان كل)
 لو شايف ان الجمله دى غلط ارجع اقراها من الشمال لليمين .. لو افترضنا ان الجمله اللى فاتت دى وجهه نظر واتنين مختلفين عليها .. واحد مش عارف يقراها من اليمين للشمال ومقتنع انها غلط والتانى قرأها من الشمال لليمين و شايف انها صح !! 

لو ركزنا فيها اوى مش هنلاقى واحد صح والتانى غلط .. لا كل واحد شايف حاجه بطريقته من وجهه نظره هو .. و اختلاف وجهات النظر ده من نعم ربنا علينا !!


لو عندك وجه نظر متحاولش تقنع نفسك ان انت الصح دايما مهما كنت مقتنع بيها .. لان فى وقت من الاوقات وجهه نظرك دى ممكن تبقى غلط .. ومش عيب انك تعترف انها كانت غلط وتتعلم من وجهه نظر اللى قدامك. بس العيب انك  تتمسك بيها و  متديش لنفسك احتمال وفرصه تغييرها للاحسن


( انسان كل مختلف متفق يكون عكس الشخص رأى صح خطأ ) طبعا أكيد حاولت تقراها من اليمين معرفتش  .. فحاولت تقراها من الشمال برضو معرفتش .. بس كويس انك بصتلها من الناحيتين !! عارف ليه ؟؟ لانك اتعلمت الدرس و بدات تبص للموقف من ناحيتين مش من ناحيه واحده. لو افترضنا ان الجمله اللى انت مش فاهمها دى موقف غامض .. أكيد مش من حقك يبقى ليك وجهه نظر وتدافع عنه .. لانك اصلا مش فاهمه ومش قادر تفهم الجمله يبقى ليه اصلا تدافع عنه !!


و ده للاسف اللى بيحصل فى مصر اليومين دول تلاقى شويه بيدافعوا عن واحد بغض النظر عن الاسامى والتانين بيدافعوا عن واحد تانى خالص و ده بيشتم فى ده وده بيشتم فى ده !!على الرغم اصلا انهم مش فاهمين ولا شافوا ايه اللى بيحصل .. وده للاسف سبب المشاكل الكتير اللى احنا فيها دلوقت. لو مش فاهم موقف معين متحاولش ابدا لا تقف ضده ولا معاه .. لان لو بقيت ضده او معاه اكيد هاتبقى سبب فى فتنه كبيره جدا وانت هاتبقى سبب فيها.


وفى الاخر هاقولك الخلاصه .. حط نفسك مكان غيرك وحاول تفهم وجهه نظره قبل ما تهاجمه .. و متحاولش ابدا ابدا تدافع عن موقف انت لا شوفته ولا فاهمه لمجرد ان يبقى عندك وجهه نظر !